Bakının Suraxanı rayonunda yerləşən Bülbülə gölünün ətrafı zibil və qamışdan təmizlənib. Bu haqda bu gün, 26 aprel tarixində Trend məlumat verib.
Hazırda gölün və onun ətrafının zərər görməməsi üçün ərazidə mühafizə xidməti həyata keçirilir.
“Bakı Abadlıq Xidməti” MMC-dən bildirilib ki, Bülbülə gölünün ətrafında yaşıl istirahət zonasının salınması nəzərdə tutulub. Müəyyən işlər tam başa çatandan sonra Bülbülə gölünün ətrafında salınacaq bulvarın layihəsi təqdim olunacaq. Gölün ətrafında kafelər, gəzinti, velosiped, skuterlər üçün yol salınması planlaşdırılır.
