Bakı bazarlarında mövsümi meyvələr göz oxşasa da, qiymətləri heç də hamının ürəyincə deyil. Bölgələrdə çox ucuz olan meyvələrin paytaxtda baha satılması az adamı narahat etmir. Üstəlik, hərdən paradoksla da rastlaşırıq: mövsümü olmadığı vaxt ucuz satılan meyvələr öz mövsümündə ikiqat baha satılır və ya əksinə. Xüsusilə yaz aylarında alça, çiyələk kimi meyvələrin erkən görünməsi alıcıların diqqətini cəlb etsə də, qiymətlər sözün əsl mənasında cib yandırır.
Bakuplus.az-ın əməkdaşları mövsümlə əlaqədar vəziyyətin necə olduğunu öyrənmək üçün paytaxt əhli arasında ən sərfəli alış-veriş məkanlarından biri kimi tanınan Yaşıl bazara baş çəkiblər.
Diqqətimizi çəkən ilk məqam bazardakı seyrəklikdir. Əvvəlki qədər sıxlıq müşahidə olunmur. Piştaxtalar isə az qala məhsulun ağırlığından sınır.
Bazarın rəngi az qala qırmızı-yaşıldır: hara baxırsan, çiyələk və alça görürsən.
Satıcı deyir ki, qiymət ölçüyə görə dəyişir:
“Çiyələyin bir kiloqramı 5-7 manat, alçanın bir ovucu isə 100 manatdır. Alıcılıq qabiliyyəti normaldır. Alıb, dadanlar çoxdur. Tələbat o qədər də az deyil”.
Digər bir satıcı isə alıcı azlığından şikayətlənir:
“Satılsa, satarıq. Mallarımızı alan yoxdur. Alan olsa, mal heç burada qalmaz. Millət ucuz mal yeyə bilmir. Baha olsa, tez alacaqlar”.
Həmin satıcı narın qiymətinin 8-9 manata olduğunu qeyd edir:
“Qiymətlər müxtəlifdir. Üzüm 7 manatdan başlayır, 15 manata qədərdir. Naringi isə 5-6 manatadır. Qırmızı almalar fərqli qiymətlərədir - 4 manatdan 8 manat aralığında”.
Digər bir piştaxtada xaricdən gətirilən kiçik bananlara rast gəlirik. Onların qiyməti 10-12 manatdır. “Gold” ananas 17-20, avokado 3 manatdır.
Satıcılardan digəri alıcılıq qabiliyyətinin bir qədər azaldığını vurğulayır:
“Alıcılıq aşağıdır. Bəzən körpə uşaq gəlir. Anası ona çiyələk ala bilmir. Hər kəs çörəkpulu üçün buradadır”.
Satıcı sonda qeyd edib ki, mövsümü meyvələr baha satılsa da, alan var:
“İnsanlar ucuz satılan mövsümi meyvələrdən daha çox, mövsümü olmayan meyvələri alırlar. Çox qəribədir. Yəqin baha qiymətə satılan məhsula tələbat artıb. Zəmanə, yəqin, bunu tələb edir”.
Nəzrin Vahid
