Bakı Ağır Cinayətlər Məhkəməsində dostunu qətlə yetirməkdə təqsirləndirilən Sakit Piriyevin cinayət işi üzrə növbəti məhkəmə iclası keçirilib.
Hakim Zaur Hacıyevin sədrliyi ilə keçirilən prosesdə təqsirləndirilən şəxs ifadəsində hadisə günü dostları ilə kafedə yeyib-içdiklərini və sərxoş olduqlarını bildirib.
O qeyd edib ki, Məzahir Xələfovla yolu keçərkən sonuncu söyüş söyüb. Bundan sonra aralarında mübahisə yaranıb. Piriyevin sözlərinə görə, Xələfov mübahisə zamanı onu da söyüb və o, əsəbiləşərək dostuna 4 bıçaq zərbəsi vurub. Onları ayırmağa çalışan Balağa Ağayevi isə qolundan bıçaqlayıb.
Hadisə 2026-cı ilin iyununda Sabunçu rayonunda baş verib. Nəticədə Məzahir Xələfov xəstəxanada dünyasını dəyişib, Balağa Ağayev isə yaralanıb.
Sakit Piriyevə qarşı Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə) maddəsi ilə ittiham irəli sürülüb.
Növbəti məhkəmə prosesi dekabrın 3-nə təyin olunub.
Mənbə: lent.az
