Azərbaycanda 10 yaşında nənəsi tərəfindən övladlığa götürülən 34 yaşlı qadın 24 il sonra bu qərarın ləğvi üçün məhkəməyə müraciət edib.
Qadın iddiasında bildirib ki, övladlığa götürülməyə səbəb olan ailəvi və sosial şərait artıq mövcud deyil. Onun əsas məqsədi doğum haqqında şəhadətnaməsində bioloji valideynlərinin adlarının bərpa olunmasıdır.
Maraqlıdır ki, qadının bioloji anası və onu övladlığa götürən nənəsi də iddia tələbini dəstəkləyib. Bioloji atası isə 1999-cu ildə, övladlığa götürülmə baş verməzdən əvvəl vəfat edib.
Səbail Rayon Məhkəməsində hakim Şahin Abdullayevin sədrliyi ilə keçirilən prosesdə iddia əsaslı hesab olunub və 2002-ci ildə məhkəmə qərarı ilə həyata keçirilmiş övladlığa götürülmə ləğv edilib.
Qərara əsasən, qadının yeni doğum haqqında şəhadətnaməsində bioloji ata və anasının adları qeyd olunacaq.
Qeyd edək ki, 2002-ci ildə verilmiş şəhadətnamədə qadının valideynləri kimi nənə və babasının adları göstərilmişdi.
Mənbə: xitab24
