Bakı Avtovağzalı gücləndirilmiş iş rejimində işləyəcək. Bu haqda bu gün, 28 dekabr tarixində APA Dövlət Avtomobil Nəqliyyatı Xidmətinə istinadən məlumat yayıb.
Yeni il bayramı ilə əlaqədar paytaxt ilə regionlar arasında sərnişindaşıyan avtobusların sayı artırılacaq.
Belə ki, normal günlərdə Bakı avtovağzalından gün ərzində 72 istiqamətə 180 avtobus çıxırdısa, bayram günlərində sərnişindaşımaların sayı 350-400 ədəd təşkil edəcək. Ümumilikdə 10.000 sərnişinin daşınacağı gözlənilir.
Əsas axının Gəncə, Lənkəran, Şirvan, Şəki, Qax, Zaqatala və Quba istiqamətlərindən olacağı nəzərdə tutulub.
Respublika ərazisində ümumilikdə 56 avtovağzal və avtostansiya kompleksi Yeni il bayramı ilə əlaqədar gücləndirilmiş iş rejiminə keçib.
