Bakının Yasamal rayonunun Zivər bəy Əhmədbəyov küçəsi, 52 ünvanındakı 1890-cı illərin sonu - 1900-cü illərin əvvəllərində tikilmiş yaşayış binası sökülüb. Bu haqda bu gün, 8 yanvar tarixində Bakuplus.az Caliber.az-a istinadən məlumat verir.
Binanın müəllifi memar Məşədi Mirzə Qafar İsmayılovdur.
Azərbaycan Memarlar İttifaqının rəsmisi, memar Əbdül Hüseynovdan əldə olunan məlumata görə, bu il oktyabrın əvvəlində bu yaşayış binasının söküntüsü Bakı Şəhərsalma və Arxitektura İdarəsi tərəfindən dayandırılıb.
“O zaman ittifaqa həmin evin fasadının qorunub saxlanacağına dair söz verilmişdi, lakin indi o sökülüb. Amma təxminən iki il bundan əvvəl Azərbaycan Memarlar İttifaqı və “Vətəndaş” İctimai Birliyi bir neçə qiymətli tikili, o cümlədən bu evi müəyyən edərək onu qorunması vacib olan tikililərin siyahısına daxil edib.
Tikilinin memarlıq abidəsi kimi tanınması, habelə bu ərazidə qiymətli memarlıq binalarının olması barədə məlumatlar toplanaraq Mədəniyyət Nazirliyinə, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə və Dövlət Şəhərsalma və Arxitektura Komitəsinə təqdim edilib.
Lakin göründüyü kimi, bütün bu müraciətlərə dövlət qurumları tərəfindən məhəl qoyulmayıb və nəticədə Bakı şəhəri 19-cu əsrin sonu - 20-ci əsrin əvvəllərinə aid daha bir tarixi-memarlıq binasını itirmiş oldu”, – deyə Hüseynov bildirib.
Dövlət Şəhərsalma və Arxitektura Komitəsinin mətbuat xidmətindən verilən məlumata görə, bu ev Azərbaycanın dövlət tərəfindən mühafizə olunan tarix, mədəniyyət və memarlıq abidələrinin Siyahısına (2001-ci ildə Azərbaycan Respublikasının Nazirlər Kabineti tərəfindən təsdiq edilmiş) daxil edilməyib. Bina qəzalı vəziyyətdə olduğuna görə hazırda sakinlərin köçürülməsi prosesi həyata keçirilir.
İlk dəfə söküntü işləri ilə bağlı xəbər ötən ilin fevral ayında yayılıb.
