Bakıda külli miqdarda dələduzluq edən şəxs barəsində məhkəmə qərar verib. Bu haqda bu gün, 2 dekabr tarixində Bakuplus.az Oxu.az-a istinadən xəbər verir.
İlqar Mustafayev (ad şərtidir) 8 il müddətinə azadlıqdan məhrum edilib. Bu haqda Bakı Ağır Cinayətlər Məhkəməsində qərar verilib.
İ.Mustafayev zərərçəkmiş Hafiz Sabirovun (ad şərtidir) 74,7 kv.m sahəsi olan qeyri-yaşayış binasına çıxarış almaq adı ilə ondan 40.000 ABŞ dolları götürüb. Daha sonra təqsirkar həmin tikilini öz adına keçirib və 129.978 AZN qiyməti olan obyekti digər şəxsə 24.000 AZN-ə satıb.
Bundan əlavə, o, digər şəxsə qarşı da oxşar dələduzluq edib. Təqsirkar başqa adama məxsus Sabunçu rayonu, Nardaran qəsəbəsində yerləşən 18 sot torpaq sahəsinə çıxarış alacağını vəd edərək 40.000 AZN pul alıb və məsələni həll etməyib.
