Bakıda Azərbaycan Respublikasının Qida Təhlükəsizliyi Agentliyi (AQTA) marketlərdə və iaşə obyektlərində yoxlamalar keçirib. Bu haqda bu gün, 19 yanvar tarixində Bakuplus.az agentliyin mətbuat xidmətinə istinadən məlumat verir.
Keçirilən reyd zamanı Binəqədi rayonunda yerləşən "Neptun" marketi, Nizami rayonunda yerləşən "Grandmart" marketi və Nərimanov rayonunda yerləşən "Xəzər" marketində baytarlıq şəhadətnaməsi və ya arayışı olmayan heyvan mənşəli məhsulların qəbulu aşkar edilib. Suraxanı rayonunda yerləşən "C-C" marketində və Abşeron rayonunda Bərgüşad Quliyevə məxsus şərab evində isə qida təhlükəsizliyi qeydiyyatına dair çıxarışın olmaması, obliqat qrupuna daxil olan işçilərin ilkin və dövri tibbi müayinədən keçməməsi və s. qanun pozuntuları aşkar edilib.
Bundan əlavə, Binəqədi rayonundakı "Cıdır Düzü" restoranında, Nərimanov rayonundakı "Gold" pub və "Fırıncı Papa" restoranında bir sıra nöqsanlar aşkar edilib.
Aşkar edilmiş nöqsanlarla bağlı qanunvericiliyin tələblərinə uyğun müvafiq tədbirlər görülüb.
