Gələn ilin oktyabrında Bakıda Beynəlxalq Astronavtika Konqresi keçiriləcək. Bu haqda bu gün, 5 dekabr tarixində Rəqəmsal İnkişaf və Nəqliyyat Nazirliyi yanında Kosmik Agentliyin ("Azərkosmos") idarə heyətinin sədri Saməddin Əsədova istinadən Report məlumat verib.
Konqres çərçivəsində "Call For Paper” adlı kosmik sahə üzrə elm müsabiqəsi, “Kosmik Liderlər Qrant Proqramı”, “Gənc Kosmik Liderlərin Tanınması Proqramı”, “Gənc Peşəkarlar Proqramı”, “IAF Tələbə Müsabiqəsi”, “Malina Astronavtika Medalı və Napolitano Mükafatı” kimi böyük təşəbbüslər reallaşdırılacaq.
Sədrin sözlərinə görə, alimlər konqresdə kosmosun imkanlarına dair 180-dən çox texniki sessiyaya qatıla biləcəklər. Əsədov elmi-tədqiqat fəaliyyəti ilə məşğul olan ali təhsil müəssisələrinin tələbələrini, professor-müəllim heyətini, o cümlədən təqaüddə olan müəllim və elmi işçiləri, ümumtəhsil məktəblərinin müəllimlərini (xüsusilə STEAM təhsili sahəsində) Beynəlxalq Astronavtika Konqresində fəal iştiraka dəvət edib.
