Neftçilər metrosu yaxınlığında avtobus zolağında park edilən avtomobillərin sahibləri artıq cərimələnməyəcəklər. Bu haqda BakuPlus.az Avtosfer.az-a istinadən bu gün, 20 aprel tarixində xəbər verir.
Paytaxtın Qara Qarayev prospektində (Neftçilər metro stansiyasının yanında, “LC Waikiki” mağazasının qarşısında) avtobus zolağında BNA tərəfindən hərəkətin təşkilində dəyişiklik edilib. Avtomobillərin rahat parklanması üçün cib tipli yerlər təşkil edilib.
“Orada cip tipli parklanma yeri təşkil edilib. Sürücülər avtomobilləri səkiyə paralel park edərsə, o zaman avtobuslar da öz zolağı ilə rahat, maneəsiz hərəkət edə bilər. Parklanma nişanının altında parklanma qaydasını göstərən əlavə məlumat lövhəciyi də var. Sözügedən yerdə düzgün şəkildə parklanma edən sürücülər bundan sonra cərimələnməyəcək”, - deyə Bakı Nəqliyyat Agentliyinin sözçüsü Mais Ağayev məsələ ilə bağlı açıqlama verib.
