Vətəndaşlara qarşı dələduzluqda ittiham olunan “Zamin Əmlak Agentliyi”nin direktoru və işçiləri həbs ediliblər. Bu haqda bu gün, 7 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Verilən məlumata əsasən, qurumun əməkdaşları 78 vətəndaşın etibarından sui-istifadə edərək onların 1.490.200 manat məbləğində pulunu dələduzluq yolu ilə ələ keçiriblər.
Xətai RPİ-nin əməkdaşları rayon ərazisində fəaliyyət göstərən “Zamin Əmlak Agentliyi”nin direktoru Oqtay Zərbəliyev və əməkdaşları Ramin Nağdəliyev, Orxan Əliyev və Natiq Şahmuradovu saxlayıblar.
Qrup üzvləri zərərçəkmişlərə güzəştli şərtlərlə ipoteka ilə ev almağa kömək edəcəkləri barədə bilərəkdən yalan vədlər veriblər.
Faktla bağlı Xətai RPİ-nin istintaq şöbəsində cinayət işi başlanıb. Oqtay Zərbəliyev və qrupun digər üzvləri məhkəmənin qərarı ilə həbs ediliblər.
