Bakıda qayda pozmayan sürücü kamera vasitəsilə cərimələnib. Bu haqda BakuPlus.az Avtosfer-ə istinadən bu gün, 2 sentyabr tarixində xəbər verir.
Sürücü Xəqani Gülməmmədov bildirir ki, idarə etdiyi 99-GU-279 qeydiyyat nişanlı "Mercedes" markalı avtomobillə avqustun 25-də paytaxtın Qara Qarayev prospektində hərəkət edərkən həmin ərazidə olan kamera vasitəsilə 50 manat məbləğində cərimələnib.
Qayda pozmadığını bildirən sürücü qeyd edib ki, onun barəsində tərtib edilmiş qərar piyada keçidində dayanmış piyadalara görə verilib: "Videogörüntüdən də aydın şəkildə görünür ki, iki piyada nizamlanmayan keçidə daxil olur və daxil olduqları istiqamət boş olsa da dayanaraq su içir və sonra söhbət etməyə başlayırlar. Onların yolu keçməyə cəhd göstərmədiyini görən sürücülər, o cümlədən də mən dayanmadan yolumuza davam etdik. Daha sonra keçməyə cəhd göstərərkən ən sonuncu maşın dayanaraq onlara yol verir. Əgər mən keçidə yaxınlaşarkən onların yolu keçməyə cəhd etdiyini görsəydim dayanıb mütləq yol verəcəkdim. Dayanmış piyadaların hərəkət sürətini və hərəkət istiqamətini dəyişmədiyim üçün barəmdə tərtib edilmiş qərarı düzgün hesab etmirəm".
İnzibati Xətalar Məcəlləsinin 330-cu maddəsinə əsasən, sürücü tərəfindən piyadalara “yol verilməməsi” dedikdə, sürücünün hərəkəti davam etdirməsi və ya yenidən hərəkətə başlaması, yaxud hər hansı manevr etməsi nəticəsində piyadanın hərəkət istiqamətini və ya sürətini dəyişdirməyə məcbur etməsi başa düşülür. Elektron qərara əlavə edilmiş görüntüdən aydın şəkildə görünür ki, cərimələnən sürücü piyadaların nə hərəkət sürətini, nə də hərəkət istiqamətini dəyişdirməyə məcbur etməyib.
"Yol hərəkəti haqqında" qanunun 40-cı maddəsində qeyd olunub ki, piyadalar yolun hərəkət hissəsində zərurət olmadan ləngiməməli və dayanmamalıdırlar.
X.Gülməmmədov Dövlət Yol Polisi İdarəsinin rəhbərliyindən tərtib edilmiş qərara xitam verilməsini xahiş edib.
[video width="640" height="352" mp4="https://bakuplus.az/storage/photos/2022/09/1662028370.mp4"][/video]
