Bakıda qızdırıcı qurğuların yoxlanılmasına başlanılıb. Bu haqda bu gün, 29 yanvar tarixində Bakuplus.az Trend.az-a istinadən xəbər verir.
Yayılan məlumatlara görə, əhaliyə xəbərdarlıq edilərək su qızdırıcılarının hamam otaqlarında istifadəsinin qadağan olduğu bildirilir. Hətta bir sıra mənzillərdə qaz xətləri möhürlənib və su qızdırıcılarına qazın verilişi dayandırılıb.
Qanunvericiliyə əsasən, Azərbaycanda hamam otağında heç bir halda su qızdırıcısından istifadə etmək olmaz. Bu haqda “Azəriqaz” İstehsalat Birliyinin Sağlamlıq, Əməyin Təhlükəsizliyi, Ətraf Mühitin Mühafizəsi və Keyfiyyətə Nəzarət Şöbəsinin rəisi İlkin Behbudov bildirib.
“Qanun deyir ki, qazpaylayıcı tərəfindən ildə bir dəfə yoxlama aparılmalıdır. Nöqsanlar aşkar olunarsa, abonentə 1 aydan çox olmayan möhlət verilir. Əgər nöqsanlar aradan qaldırılmazsa, bizim tərəfimizdən həmin cihaza gedən qazın təminatı dayandırıla bilər”, – deyə o əlavə edib.
