Bakıda Quran kitablarının sərgisi keçirilir. Bu haqda bu gün, 30 yanvar tarixində Bakuplus.az ARB Xəbər-ə istinadən xəbər verir.
Tədbir çərçivəsində 150 qədim Quran kitabı, Quranın təsvirləri, həmçinin müxtəlif şairlərin dini şeirləri nümayiş olunur. Müqəddəs kitabların ölkənin ayrı-ayrı ərazilərindən gətirildiyi bildirilir.
“Sərgidə Oğuz, Astara, Saatlı rayonlarından yaşı 300-dən çox olan Quran kitabları var. Kitabların hamısı əlyazmadır. Həmçinin burada qızıl xətti ilə yazılmış Quran kitabı var. Əfqan və digər müxtəlif dillərdə əlyazmalar mövcuddur”, – deyə Qədim Quran Araşdırma Mərkəzinin sədri Nəhayət Hüseynova bildirib.
Sərgidəki ən qədim Quran Qaxdan gətirilib, onun 950 yaşı var.
Qədim Qurani-Kərim kitablarının növbəti il ərzində Qarabağın mədəniyyət beşiyi sayılan Şuşada nümayiş olunması planlaşdırılır.
Tədbir saat 10:00-dan 17:00-dək Gəncliyə Yardım Fondunun H.Z. Tağıyev adına konfrans zalında keçirilir. Ünvan: Səbail rayonu, Cafarov Qardaşları küçəsi.
