Bakı Şəhər İcra Hakimiyyəti (BŞİH) tərəfindən keçirilən reyd nəticəsində paytaxt ərazisində 127 qeyri-qanuni tikili aşkar olunub. Bu haqda bu gün, 11 mart tarixində APA məlumat verib.
BŞİH-də icra hakimiyyəti başçılarının və digər məsul qurumların iştirakı ilə Bakı şəhərində qanunsuz tikililərlə bağlı vəziyyət və belə halların qarşısının alınması müzakirə olunub.
İclasda bir sıra icra hakimiyyəti başçılarına ərazidəki qanunsuz hərəkətlərlə bağlı xəbərdarlıq edilib, qanunsuz tikintilərin qarşısının alınması üçün təxirəsalınmaz tədbirlərin görülməsi və 2 ay müddətində məlumat verilməsi barədə tapşırıqlar verilib.
Müşavirədə, həmçinin, yaz mövsümü ilə əlaqədar şəhərin parklarında, “Abad məhəllə”lərində cari təmir işlərinin aparılması, ağaclara və yaşıllıqlara qulluq işinə nəzarətin gücləndirilməsi ilə bağlı müvafiq tapşırıqlar verilib.
