Bakıda Rüstəm İbrahimbəyovun muzeyinin yaradılması planlaşdırılır. Bu haqda bu gün, 5 fevral tarixində Bakuplus.az Report-a istinadən xəbər verir.
Azərbaycanın Xalq yazıçısı, dramaturq, ssenarist və rejissor, Rusiya Federasiyasının Əməkdar incəsənət xadimi Rüstəm İbrahimbəyovun paytaxtda muzeyi açılacaq. Onun kitablarının Azərbaycan dilinə tərcüməsi və retrospektiv nümayişləri olacaq.
"Planlar çoxdur. Biz hər vəchlə bunun üzərində işləyirik. Mən bunu Rusiyada etmək istərdim, amma Bakıda təşkil etmək daha asandır. Atamın kitabları çıxır, biz türk dilinə tərcümə etmişik, indi ikicildlik Azərbaycan dilində çıxacaq. Vaxtilə "Azərbaycanfilm"də çəkilmiş, bərpa edilmiş bəzi filmlər var. Bunlar rejissor Rasim Ocaqovun çəkdiyi məşhur filmlərdir”, – deyə dramaturqun qızı Fatimə İbrahimbəyova qeyd edib.
İbrahimbəyov müxtəlif ölkələrin yüzdən çox teatrında səhnələşdirilmiş 15 teatr tamaşasının müəllifidir. Ədəbi əsərləri ingilis, alman, fransız, çex və başqa dillərə tərcümə olunub.
