Paytaxtda itən əşyalarla bağlı Tapıntılar bürosuna olunan müraciətlərin sayında artım var. Bu haqda BakuPlus.az Report-a istinadən bu gün, 12 aprel tarixində xəbər verir.
Daxili İşlər Nazirliyinin Mətbuat Xidmətinin polis leytenantı Nurlan Əliyevin sözlərinə görə, Bakıda insanların sıx toplaşdığı ərazilərdə, kafelərdə, restoranlarda, kinoteatrlarda unudulmuş və ya itirilmiş əşyalar adətən digər vətəndaşlar tərəfindən Bakı Şəhər Baş Polis İdarəsinin tabeçiliyində fəaliyyət göstərən Tapıntılar Bürosuna təqdim olunur.
İtən əşyanın sahibinin şəxsiyyəti müəyyən olunduqdan sonra əşyanın təhvil verilməsi təmin olunur.
Qurumun əməkdaşı deyib ki, sənədin və ya əşyanın sahibi bəlli olmadıqda o, aidiyyəti üzrə təhvil verilir.
Nurlan Əliyev əlavə edib ki: "Sevindirici haldır ki, son zamanlar nümunəvi vətəndaşlar çoxdur. Digər şəxslərə aid əşyaları vətəndaşlar tapıb gətirərək Büroya təqdim edirlər. Bu say çoxdur. Bu hal təqdirəlayiqdir. Vətəndaşlardan daha diqqətli davranmağı və şəxsi əşyalarını unutmamağı xahiş edirik", - DİN rəsmisi vurğulayıb.
