Bakıda ata və oğulu bıçaqlayan qonşu saxlanılıb. Bu haqda bu gün, 5 iyul tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Polis əməkdaşları tərəfindən Amil Cahangirova və onun atası Hikmət Cahangirova kəsici alətlə xəsarət yetirməkdə şübhəli bilinən 39 yaşlı Aqil Bayramov saxlanılaraq istintaqa təhvil verilib.
Faktla bağlı Cinayət Məcəlləsinin adam öldürməyə cəhd maddəsi ilə cinayət işi başlanıb, istintaq aparılır.
Baku TV-dən əldə olunan məlumata görə, toy məclisində qonşular arasında mübahisə yaranıb. Xəsarət alanların qohumu Zaur Kərimov bildirib ki, toydan sonra Amil atası ilə evə gedib. Lakin bir müddət sonra qonşu onları “söhbətə” çağırıb. Nəticədə Amilə altı, atasına isə üç bıçaq xəsarəti yetirilib.
