İyulun 25-dən uşaqların 2023-2024-cü tədris ili üçün bağçalara qəbuluna start verilir. Bu haqda bu gün, 19 iyul tarixində Bakuplus.az Elm və Təhsil Nazirliyinə istinadən məlumat verir.
Valideynlər www.bq.edu.az saytına daxil olaraq elektron kabinet yarada biləcəklər.
Bakı şəhəri üzrə 8 avqust saat 11:00-da valideynlər qəbulla bağlı növbə yarada biləcəklər. Qəbul sentyabrın 1-nə kimi davam edəcək.
Bir uşaq üçün maksimum 3 bağça seçmək mümkündür. Mövcud növbələrin sorğulara çevrilməsi prosesi mövcudluqdan asılı olaraq, minimum 5 gündən sonra həyata keçiriləcək. Növbə sorğuya çevrildikdən sonra valideyn (və ya qanuni qəyyum) 15 gün ərzində müvafiq quruma müraciət etməlidir, əks halda sorğu silinəcək və növbəyə başqa uşaq qoyulacaq.
Elektron qəbul sistemi 1-15 sentyabr tarixlərində qrupların komplektləşdirilməsi səbəbindən müvəqqəti dayandırılacaq. Proses başa çatdıqdan sonra bağçalarda boş qalan yerlərə uşaqların qəbulu ilboyu davam etdiriləcək.
Ötən tədris ilində qəbul sistemində yaradılan növbələr və sorğular arxivləşdirilərək valideyn kabinetinə əlavə edilib. Həmin növbələr və sorğular bu il keçərli deyil.
