Paytaxtın Nizami küçəsi, 4 ünvanında yerləşən yaşayış binasının blokunun düz qarşısında obyekt tikilib. Bu, blokun girişinin və liftlərin yeni obyektin daxilində qalmasına səbəb olub. Nəticədə sakinlər qonşu blokdan keçərək mənzillərinə daxil olmaq məcburiyyətində qalırlar. Bu haqda bu gün, 27 avqust tarixində Bakuplus.az Xəzər Xəbər-ə istinadən məlumat verir.
Həmin beş bloklu yaşayış binası “Pilot Residence” MTK-nın pilot layihəsi çərçivəsində inşa edilib.
Sakinlər iddia edirlər ki, onlar üçün nəzərdə tutulan bu binanın bloku ilə mənzillərinə qalxa bilmirlər. Onların sözlərinə görə, onlara təqdim olunan layihədə bu obyektdən bəhs edilməyib. Yəni həmin sahə layihədən çıxarılaraq iri supermarket şəbəkəsinə satılıb.
Burada yaşayan bəzi vətəndaşlar onu da qeyd edir ki, pulunu ödədikləri qarajlardan da məhrum ediliblər. Onlar hesab edir ki, qarajlar anbar yeri üçün adıçəkilən mağazaya satılıb.
“Pilot Residence” MTK bildirdi ki, layihəyə əsasən, təkcə orada deyil, həm də binanın həyətində 3300 kvadratmetr olan sahədə obyekt nəzərdə tutulub.
Dövlət strukturları tərəfindən bu obyektlərin tikintisinə hələlik icazə verilməsə də, sakinlər artıq mənzillərinə çıxış imkanlarını itiriblər.
"Qarajlara gəlincə, onların əvəzinə sakinlərə başqa yer təklif olunur. Lakin problem hələ də həllini tapmayıb. Çünki vətəndaşlar müvafiq sənədlərdə göstərilən yerlərin tam olaraq təmin olunmasını istəyirlər", - deyə tikinti şirkətindən bildirilib.
Dövlət Şəhərsalma və arxitektura komitəsindən məsələnin araşdırılacağı bildirilib.
[caption id="attachment_66237" align="alignnone" width="800"]
Foto Real Tv-nin rəsmi Youtube kanalı[/caption]
