Paytaxtın bir çox küçə və prospektlərində çəkilən xətlər və zolaqlar tez-tez pozulur. Bu haqda bu gün, 3 fevral tarixində Bakuplus.az ATV News-a istinadən xəbər verir.
Bir çox küçələrdə yol nişanlarının və piyada zolaqlarının silindiyi müşahidə edilir. Bu səbəbdən də sürücülər və vətəndaşlar üçün çaşqınlıq yaranır.
Sakinlərin sözlərinə görə, yol nişanları keyfiyyətsiz boyadan istifadə olunduğu üçün silinir. Bu da bəzən ağır qəzalara səbəb olur.
İsmayıl Talıblı küçəsində nə xəbərdarlıq nişanı, nə də piyada keçidi nişanı var. Yolda çəkilən zolaq isə silinib. Abbas Mirzə Şərifzadə küçəsində isə yolda geri dönmək manevri etmək icazəsi olsa da, orada nə geri dönmə nişanı quraşdırılıb, nə də ki yerdə geriyə dönmə xətti çəkilib.
Ekspert Elməddin Muradlı deyir ki, Azərbaycanda asfalt üzərində vurulan boyalarda işıqqaytarıcı və fosfor elementləri yoxdur.
Hətta müasir dövrdə istifadə edilən asfalt boyaları sövet dövründəki boyalarla müqayisədə daha keyfiyyətsizdir.
“Ən təhlükəli bir vəziyyət piyada keçidlərinin silinməsidir ki, bu artıq adi hala çevrilib”, - deyə ekspert qeyd edib.
O əlavə edib ki, yol nişan xətləri silinibsə və sürücü buna görə cərimələnirsə, o, məhkəməyə müraciət edə bilər. Eləcə də eyni səbəbdən qəzaya düşürsə, vətəndaşın tam hüququ var ki, həmin yola nəzarət edən quruma məhkəmə iddiası qaldırsın.
Azərbaycan Avtomobil Yolları Dövlət Agentliyindən (AAYDA) isə bildirildi ki boyaların silinməsi yollardakı intensivlik və ya meteoroloji amillərin təsiri ilə əlaqədardır. Silinən nişanlanma xətlərinin yenilənməsi isə mərhələli qaydada həyata keçirilir.
