Bakıda polis əməkdaşları Azərbaycan bəstəkarı Üzeyir Hacıbəyovun Milli Konservatoriyanın yaxınlığında yerləşən abidəsinə ayaqqabı atan iki şəxsin kimliyini müəyyən ediblər. Bu haqda bu gün, 6 yanvar tarixində Daxili İşlər Nazirliyinin mətbuat xidmətinin polis baş leytenantı Nurlan Əliyev bildirib.
Polis əməkdaşları tərəfindən keçirilmiş tədbirlər zamanı əməli törətmiş 21 yaşlı Elvin İsmayılov və 17 yaşlı Fərid Cəfərov müəyyən olunaraq saxlanılıblar.
Faktla bağlı hər iki şəxs barəsində İnzibati Xətalar Məcəlləsinin müvafiq maddələri ilə inzibati xəta haqqında protokol tərtib edilib, Fərid Cəfərov cərimə olunub, Elvin İsmayılov isə məhkəmənin qərarı ilə 15 gün müddətinə inzibati qaydada həbs edilib.
Daha öncə Nəsimi rayonunda yerləşən heykəlin üzərinə yad cismin atılması ilə bağlı sosial şəbəkələrdə görüntülər yayılıb.
