Bakıda 17-ci Azərbaycan Beynəlxalq Kənd Təsərrüfatı sərgisi keçirilir. Bu haqda bu gün, 15 may tarixində Bakuplus.az APA-ya istinadən xəbər verir.
17-ci Azərbaycan Beynəlxalq Kənd Təsərrüfatı Sərgisi "Caspian Agro" və 29-cu Azərbaycan Beynəlxalq Qida Sənayesi Sərgisi "InterFood Azerbaijan" Bakı Ekspo Mərkəzində start götürüb.
Açılış mərasimində çıxış edən kənd təsərrüfatı naziri Məcnun Məmmədov, Belarus Respublikası Baş nazirinin müavini İqor Petrişenko, Qida Təhlükəsizliyi Agentliyinin sədri Qoşqar Təhməzli, Kiçik və Orta Biznesin İnkişafı Agentliyinin (KOBİA) idarə heyətinin sədri Orxan Məmmədov, eləcə də Özbəkistan kənd təsərrüfatı nazirinin müavini Alişer Şükürov, Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev, FAO-nun ölkəmizdəki nümayəndəsi Muhammad Nasar Hayat və “ITE Group” şirkətinin Baş icraçı direktoru Edvard Strun iştirak ediblər.
Sərgilər ümumilikdə 38 ölkədən 500-ə yaxın şirkəti bir araya gətirib. Ötən illə müqayisədə sərgilərin miqyasında 10% artım müşahidə olunur. Sərgilərdə ümumilikdə İspaniya, Finlandiya, Çin, Cənubi Koreya, Əfqanıstan, İndoneziya və daha 44 ölkənin məhsulları nümayiş etdirilir.
Sərgi çərçivəsində Azərbaycanın 42 rayonundan fermerlər qabaqcıl texnologiyalar və yeni sənaye təcrübələri ilə tanış olmaq imkanı əldə edəcəklər.
Bundan əlavə, bu il sərgidə ilk dəfə olaraq Aqrar İnnovasiya Mərkəzinin təşkilatçılığı ilə “Yaşıl dünya naminə həmrəylik ili” çərçivəsində “GreenAgroHack” hakaton yarışması keçiriləcək.
