Bakıda “Kəndin Xəzinəsi” adlı proqram təşkil olunacaq. Bu haqda bu gün, 29 yanvar tarixində Bakuplus.az Smartnation.az-a istinadən xəbər verir.
Sözügedən layihənin əsas məqsədi Bakının kəndlərində yaşayan məktəbli və gəncləri fərdi potensialın kəşfində, yumşaq bacarıqların inkişafında lazımi dəstəyi göstərmək, həmçinin yaşadıqları kənddə gənclərin ehtiyac və imkanlarını nəzərə alaraq, resurs mərkəzlərinin formalaşması və icma fəaliyyətlərinin təşkilində aktiv şəkildə iştiraklarına dəstək olmaqdır.
Proqram 3 ay davam edəcək. Bu müddətdə iştirakçılar gələcəyin bacarıq və peşələri, düzgün karyera hədəflərinin müəyyənləşdirilməsi, təhsilin həyatımızda və cəmiyyətimizdə rolu kimi mövzularda təlimlərə cəlb olunacaqlar.
Bundan əlavə, gənclər onların özləri yaşadıqları kəndlərdə resurs mərkəzlərinin yaradılması prosesində birbaşa iştirak edəcək və mentorlar tərəfindən menecer olaraq yetişdiriləcəklər.
Layihədə 14-25 yaşlı yeniyetmə və gənclər iştirak edə bilərlər.
Tədbir Elm və Təhsil Nazirliyinin və ABŞ-nin Azərbaycandakı Səfirliyinin dəstəyi ilə həyata keçirilir.
Ətraflı məlumat üçün 055 917 52 02 nömrəsi ilə əlaqə saxlaya bilərsiniz.
