Rus dilində yazan azərbaycanlı şair Sahib Məmmədov hər il Çində keçirilən “Dünyanın ən yaxşı şairləri və tərcüməçiləri” beynəlxalq müsabiqəsinin yekunlarına görə “İlin ən yaxşı şairi” adına layiq görülüb. Bu haqda bu gün, 27 dekabr tarixində 1News məlumat verib.
Müsabiqəyə ənənəvi olaraq, Pekin Beynəlxalq Şeir Tərcümə Araşdırma Mərkəzi (IPTRC) ev sahibliyi edib.
Mükafat 18 ölkədən tanınmış şair, tərcüməçi və alimlərdən ibarət münsiflər heyəti tərəfindən irəli sürülüb. Üç tur səsvermə iki ay davam edib. Nəticədə 13 ölkədən 14 şair və tərcüməçi qalib olub.
Qaliblərin siyahısı: Sahib Məmmədov (Azərbaycan), Peter Niberg (İsveç), Maria do Samero Barroso (Portuqaliya), Olqa Levadnaya (Rusiya), Nina Aleksi (Yunanıstan), Rahim Kərim (Qırğızıstan), Vu Tao (Çin), Əli əl-Xəzmi (Səudiyyə Ərəbistanı), Daniela Andonovska-Trajkovska (Şimali Makedoniya), Bavani Şankar Nair (Hindistan) ən yaxşı şairlər elan ediliblər.
Sahib Məmmədov 1986-ci ildə Bakıda anadan olub, hazırda da Bakıda yaşayır. 1997-2012-ci illərdə idmanla məşğul olmuşdur, boks üzrə idman ustasıdır.
Sahib Məmmədov Rusiya Federasiyası Yazıçılar İttifaqının, Şimali Amerika Yazıçılar Birliyinin və Beynəlxalq Yazıçılar Birliyinin üzvüdür.
