Gecə saatlarından başlayan yağış Bakı yollarında həm piyadalar, həm də sürücülər üçün çətinlik yaradıb. Bu haqda bu gün, 10 dekabr tarixində Bakuplus.az məlumat verib.
Bakının müxtəlif rayonlarında yağış sularının axması piyada keçidlərini və yolları keçilməz edib.
Qeyri-sabit şəraitləri nəzərə alaraq, Baş Dövlət Yol Polisi İdarəsi (BDYPİ) vətəndaşlara müraciət edib.
“Həftəsonu bölgələrə və paytaxta səfər edənlərin sayında artım müşahidə olunacağını nəzərə alaraq, şəxsi avtomobillə səfərə çıxan, eləcə də sərnişindaşıma fəaliyyəti göstərən sürücülərə əlverişsiz hava şəraitində daha diqqətli olmağı, sürət həddini nəzarətdə saxlamağı, nasaz nəqliyyat vasitələri ilə yola çıxmaqdan çəkinməyi, ötmə və manevr zamanı təhlükəsizlik qaydalarına ciddi əməl etməyi tövsiyə edirik.
Bununla yanaşı, yağışlı havanın, xüsusilə moped və motosiklet idarə edən şəxslər üçün təhlükəli olduğunu nəzərə alaraq, sifarişli çatdırılma xidməti göstərən şəxslərdən bu tip nəqliyyat vasitələrindən mümkün qədər az istifadə etmələrini xahiş edirik", - müraciətdə qeyd olunub.
