Bakı-Sumqayıt yolunda nəqliyyatın hərəkəti iflic olub, səhər saatlarında orada 10-a yaxın zəncirvari qəza baş verib. Bu haqda bu gün, 9 yanvar tarixində Trend məlumat verib.
Yolun hərəkət hissəsi qar və buz bağladığından nəqliyyatın hərəkəti dayandırılıb. Abşeron rayonu ərazisindən keçən yolun kilometrlərlə hissəsi qar və buzdan təmizlənməyib. Bu ərazidə yolun təmizlənməsinə heç bir texnika cəlb olunmayıb, nəticədə səhər saatlarında orada 10-a yaxın zəncirvari qəza baş verib.
Əraziyə çoxlu sayda cəlb olunan yol polisi və post-patrul xidmətinin əməkdaşları yolda idarəetməni itirmiş sürücülərə kömək edərək, hərəkəti təmin etməyə çalışırlar.
Ötən gündən etibarən Bakıda və Abşeron yarımadasında qar yağır. Paytaxtda qeyri-sabit hava şəraiti yanvarın 12-dək davam edəcək.
