Bakıda betonqarışdıran maşının sürücüsü yeni təmir olunan yola maye beton töküb. Bu haqda bu gün, 16 dekabr tarixində Bakuplus.az Azərbaycan Avtomobil Yolları Dövlət Agentliyinin (AAYDA) mətbuat xidmətinə istinadən məlumat verir.
AYDA-nın mətbuat xidmətinin rəhbəri Anar Nəcəflinin verdiyi məlumata görə, 99-JK-337 dövlət nömrə nişanlı betonqarışdıran maşının sürücüsü axşam saatlarında paytaxtın Binəqədi rayonu ərazisində, Baksol yolunda maye beton töküb.
Həmin əməl yol infrastrukturuna və asfalt-betona zərər vurmaqla yanaşı, digər hərəkət iştirakçılarına da təhlükə yaradıb.
Faktla bağlı toplanmış materiallar sürücünün inzibati məsuliyyətə cəlb edilməsi üçün məhkəməyə, eləcə də Baş Dövlət Yol Polisinə göndərilib.
Azərbaycan Respublikası İnzibati Xətalar Məcəlləsinin 352-ci maddəsinə əsasən, avtomobil yollarının maye beton, çınqıl, yanacaq-sürtkü materialları və s. Ilə çirkləndirilməsi zamanı fiziki şəxslər 30 manatdan 50 manatadək, vəzifəli şəxslər 150 manatdan 200 manatadək, hüquqi şəxslər isə 1500 manatdan 2000 manatadək miqdarda cərimə edilirlər.
