Bu gün, 25 iyun tarixində Bakıdan Füzuliyə ilk müntəzəm avtobus yola düşüb. Bu haqda Bakuplus.az Dövlət Avtomobil Nəqliyyatı Xidmətinin mətbuat katibi Anar Rzayevə istinadən məlumat verir.
İlk mərhələdə Bakı-Füzuli-Bakı marşrutu üzrə avtobuslar həftədə bir dəfə hərəkət edəcək. Daşımaların təhlükəsizliyini təmin etmək məqsədilə avtobusları Daxili İşlər Nazirliyinin yol-patrul xidmətinin ekipajları müşayiət edəcək, avtobuslarda polis əməkdaşlarının da iştirakı təmin edilir.
Sərnişinlər Merdinli kənd məscidinə, şəhər mərkəzinə və Füzuli şəhərinin Füzuli Beynəlxalq Hava Limanına baş çəkə biləcəklər.
Növbəti mərhələdə, müvafiq işlər aparıldıqdan sonra reyslərin tezliyinin artırılması nəzərdə tutulur. Avtobusda sərnişinlər üçün nəzərdə tutulmuş yerlərin sayı 59-a bərabərdir. Birinci reys üçün bütün biletlər satılıb.
Biletlər www.yolumuzqarabaga.az portalında onlayn satılır. Bakıdan Füzuliyə avtobus biletinin qiyməti (gediş-gəliş) 18 manat 40 qəpik təşkil edir.
