Bakı Tikiş Evi yeni məktəbli formasının tikilişi və satışını davam etdirir. Gün ərzində 500-600 dəst tikilir və eyni sayda dəst satılır. Bu haqda bu gün, 30 avqust tarixində Bizim.Media məlumat verib.
Bakı Tikiş Evinin satış şöbəsinin müdiri Etibar Əzimov bu il məktəbli formalarının istehsalında yaranan çətinliklərdən danışıb. Onun sözlərinə görə, parçaların təchizatında müəyyən problemlər var. Malların bir hissəsi Rusiyada gömrükdə qalıb, fabrik isə materialların çatdırılmasını gözləyir. Elə bu səbəbdən hazırda yalnız 1-4-cü siniflər üçün formalar hazırlanır.
Əzimovun sözlərinə görə, bu il yuxarı siniflər üçün məktəbli forması verilməyəcək.
“Bununla bağlı narazılıq edənlər də var. Zaman az olduğu üçün yuxarı siniflər üçün hələ ki, forma hazırlanmayıb. Bu il ancaq ibtidai sinifləri təmin etmək gücündəyik. Mərkəzi satış nöqtəmiz fəaliyyət göstərir. Əlavə olaraq “Bravo” marketlər şəbəkəsində də məktəbli formaları satışa çıxarılır. Qərarda 4 rəng üzrə forma tikilməsi təklif olunub. Amma biz iki rəngdən istifadə edirik”, - deyə Etibar Əzimov qeyd edib.
Yeni formanın satışı avqustun 17-dən başlayıb. Formaların qiyməti 55-65 manat təşkil edir.
