“AZAL” QSC-nin tərkibinə daxil olan aşağıbüdcəli “Buta Airways” aviadaşıyıcısı bu gün, 22 dekabr tarixində saat 16:00-dan etibarən bütün hava limanları vergiləri daxil olmaqla minimum 29 avroya “Büdcə” tarifi ilə 10.000 biletin onlayn satışına başlayacaq. Bu haqda Bakuplus.az məlumat verir.
Bu təklif aviaşirkətin aşağıdakı 9 istiqaməti üzrə keçərlidir: Ankara, İzmir, İstanbul (Sabiha Gökçen Hava Limanı), Tbilisi, Aktau, Həştərxan, Mineralnıye Vodı, Kazan və Ufa.
Aviaşirkətin www.butaairways.az rəsmi internet saytından uçuş cədvəli ilə ətraflı tanış olmaq və aviabiletləri əldə etmək olar.
"Büdcə" tarifi ilə əldə olunan biletlərə ödənişsiz baqajın və ya əl yükünün daşınması daxil deyil, lakin təyyarənin göyərtəsinə ölçüləri 30x35x10 sm-ə qədər bel çantası, qadın əl çantası və ya kişi portfeli götürmək olar.
Aviadaşıyıcının reyslərində “Büdcə” tarifinə əlavə olaraq “Standart” (55 avrodan) və “Super” (75 avrodan) tarifləri ilə aviabiletlər əldə etmək mümkündür ki, buraya müvafiq olaraq, 10 kq və 23 kq baqaj daxildir.
