Fəaliyyətini dayandırması ilə gündəmə gələn "Buta” klinikasının rəhbərliyi açıqlama verib. Bu haqda BakuPlus.az Qafqazinfo-ya istinadən bu gün, 25 iyun tarixində xəbər verir.
Paytaxtın Nərimanov rayonu ərazisində fəaliyyət göstərən klinikanın İctimaiyyətlə Əlaqələr departamentindən verilən məlumata görə, klinika hazırda öz fəaliyyətini davam etdirir və bütün personalı ilə iş başındadır.
“Bəzi Kütləvi İnformasiya Vasitələrində (KİV) klinikamızda Fövqəladə Hallar Nazirliyinin (FHN) yoxlamalar keçirməsi və fəaliyyətini dayandırması barədə informasiyalar yayılıb. Tərəfimizdən bildiririk ki, nazirlik əməkdaşları klinikaya baxış zamanı bəzi məhdudiyyətlər tətbiq etsələr də, bunun aradan qaldırılması üçün vaxt təyin ediblər. Biz də öz növbəmizdə mütəxəssislərin iştirakı ilə qeyd olunan nöqsanların aradan qaldırılması istiqamətində fəaliyyətə başlamışıq.
Aşkar olunan nöqsanlar aradan qaldırıla biləndir və tərəfimizdən bütün tədbirlər görüləcək. "Buta” klinikası tam gücü ilə fəaliyyət göstərir və müasir tibbin yenilikləri ilə bundan sonra da fəaliyyətini davam etdirəcək”, - deyə məlumatda qeyd edilir.
