Bakının Xəzər rayonu, Buzovna çimərliyi sahillərini zəbt edən, illərdir fəaliyyət göstərən daha bir məşhur restoran sökülüb. 10 ildir fəaliyyət göstərən “Sherlocks”-dan sonra növbə “Seaside” restoranına çatıb. Bu haqda 30 iyun tarixində Baku TV reportaj hazırlayıb
Restoranın dənizə yaxın ərazidə yerləşən tikintilərinin söküldüyü qeyd edilir.
Qeyd edək ki, söküntü işlərinə səbəb bu ərazilərdə aparılan araşdırmalar zamanı son 10-15 il ərzində burada bəzi insanlar tərəfindən sahilə keçidlərin bağlanması, həmçinin qədim qayalıqların zibillənməsi hallarının müəyyən edilməsi olub. Bu da sakinlər arasında haqlı narazılıqlar yaradıb.
Bakı şəhər İcra Hakimiyyətindən verilən məlumata görə, bəzi yerlərdə sakinlər qanunsuz olaraq əlavə torpaq sahələrini zəbt edərək öz həyətlərinə birləşdiriblər. Əlavə edək ki, qanunsuz tikililərin sökülməsi işləri Xəzər dənizinin bütün sahil ərazilərini əhatə edəcək. Təmizlənən torpaq sahələri isə çimərlik ərazilərinə birləşdiriləcək.
