Bakıda neft-mədən obyektlərinin yerləşdiyi ərazilərin qanunsuz zəbt edilməsi və vətəndaşlara satılması problemi hələ də qalmaqdadır. Bu haqda bu gün, 8 iyun tarixində Report məlumat verib.
Əhalinin sürətlə məskunlaşdığı ərazilərdən biri də Buzovna qəsəbəsindəki Hacı Zeynalabdin Tağıyev adına Neft və Qazçıxarma İdarəsinin ərazisidir. Yataq ərazisinin bir hissəsi artıq yaşayış massivinə çevrilib.
Burada yaşamağın təhlükəsi barədə vətəndaşlara dəfələrlə məlumat verilib. Amma buna baxmayaraq, yüzlərlə sakin mənzil problemini bu yolla həll etməyə çalışır. Proses zamanı məlum olur ki, neft mədənlərinin ərazisi əsasən müxtəlif biznes maklerləri tərəfindən zəbt edilərək vətəndaşlara satılır.
Neft-qazçıxarma idarəsinin mühafizəsini həyata keçirən Mühafizə Əməliyyat Xidmətinin müşaviri Almaz Əhmədovun sözlərinə görə, burada yaşayan sakinlər təhlükə altındadır. Radiasiya bir çox xəstəliklərə, o cümlədən qan xərçənginə səbəb olur. Ona görə də vətəndaşlara neft mədənlərinin ərazilərində torpaq almamaq tövsiyə olunur.
Xəzər Rayon İcra Hakimiyyətinin təsərrüfat şöbəsinin müdiri Rəsul Rəsulovun sözlərinə görə, qurum problemdən xəbərdardır və ərazidə qanunsuz tikintilərin qarşısının alınması üçün mübarizə aparılır.
[caption id="attachment_47818" align="alignnone" width="800"] Foto Report.az saytı[/caption]
