Yasamal Rayon Məhkəməsində dələduzluqda təqsirləndirilən Samir Yusiflinin (adı şərtidir) cinayət işi üzrə hazırlıq iclası keçirilib.
Demokrat.az xəbər verir ki, hakim Rəşad Cavadzadənin sədrliyi ilə keçirilən prosesdə elan olunub ki, təqsirləndirilən şəxsə Cinayət Məcəlləsinin müvafiq maddələri ilə ittiham verilib.
İttihama görə, Samir Yusifli Naxçıvan MR Qaz İstismar Xidmətinin Təmir-Tikinti və Quraşdırma İdarəsində baş mühəndis işlədiyi dövrdə vəzifə səlahiyyətlərindən sui-istifadə edərək bir neçə nəfəri işə düzəltmək vədi ilə aldadıb. Belə ki, 2025-ci ilin aprel ayında o, Naxçıvan şəhərində çayxanada tanışlıq əlaqəsi qurduğu Famil Fərəcova yalan vədlər verib.
Bundan başqa, 2025-ci ilin avqust ayının sonlarında Samir Yusifli əvvəllər iş yoldaşı olmuş zərərçəkmiş Elmir Abbasovu Su Meliorasiya İdarəsinə müavin vəzifəsinə işə düzəltmək vədi ilə aldadıb. O, Bakı şəhəri Yasamal rayonu, Moskva prospekti 67 ünvanında yerləşən Azərbaycan Dövlət Su Ehtiyatları Agentliyinin inzibati binasının yaxınlığındakı çayxanada zərərçəkmişdən 5 000 manat məbləğində pul alaraq mənimsəyib. Həmçinin Samir bir neçə başqa şəxslərlə də şəhərdəki çayxanalarda görüşərək müəyyən vədlər verərək onları aldadıb.
2025-ci ilin aprel–avqust aylarında müxtəlif şəxslərdən övladlarını və ya özlərini vəzifəyə təyin etdirmək adı ilə ümumilikdə 39 500 manat pul alaraq mənimsədiyi bildirilir.
Müdafiə tərəfi işin ərazi aidiyyəti üzrə Naxçıvan Şəhər Məhkəməsinə göndərilməsini istəyib. Dövlət ittihamçısı etiraz etsə də, məhkəmə vəsatəti əsaslı sayaraq cinayət işinin Naxçıvan Şəhər Məhkəməsinə göndərilməsi barədə qərar qəbul edib.
