Dəm qazından zəhərlənmələrin sayı niyə artıb? Bu haqda bu gün, 29 yanvar tarixində Bakuplus.az ARB-yə istinadən xəbər verir.
Son 2 gün ərzində ölkədə 7 nəfər dəm qazından dünyasını dəyişib. Ölüm hadisələrinin əsas səbəbi nədir?
İndiyədək dəm qazından baş verən ölüm hadisələrinin əksəriyyətinə qapalı şəraitdə quraşdırılan su qızdırıcıları səbəb olub.
Satıcıların sözlərinə görə, insanlar ucuz su qızdırıcıları alırlar. Bu da keyfiyyətdə öz əksini tapır.
“Keyfiyyətli qurğularda havalandırma olur. Sızma olsa belə, qazı çölə vurur. Daha ucuz su qızdırıcılarının bacası yaxşı çəkməsə, qaz evin içinə sızır”, – deyə satıcılar qeyd edirlər.
Onların sözlərinə görə, təhlükə barədə insanlara xəbərdarlıq edilsə də, onlar buna məhəl qoymurlar. Həmçinin quraşdırılma zamanı təhlükəsizlik qaydalarına riayət edilmir.
Təhlükəsizlik eksperti Orxan Musayevin sözlərinə görə, bu kimi halların qarşısını almaq üçün xüsusi detektorların qoşulması zəruridir:
“Qaz sızması baş verərsə, qaz detektorları işə düşür və insanı qaz sızması ilə bağlı məlumatlandırır. Detektorların olmadığı mənzillərdə isə havalandırma sistemi və tüstü bacaları vaxtı-vaxtında təmizlənməlidir, su qızdırıcıları mütəmadi olaraq usta nəzarətində olmalıdır”, – deyə ekspert vurğulayıb.
