Bu gün noyabrın 8-nə keçən gecədən başlayaraq Bakıda Zəfər günü münasibətilə silsilə tədbirlər keçirilir. Bununla bağlı Dövlət Yol Müfəttişliyi sürücülərə müraciət edib.
Polisin mətbuat xidməti əvvəlcədən küçə və prospektlərin bağlanması ilə bağlı ətraflı məlumat verib. Lakin bəzi sürücülər xəbərdarlığa məhəl qoymayıb və nəticədə Neftçilər prospektində bir neçə yol-nəqliyyat hadisəsi baş verib. Bu barədə Baş Dövlət Yol Müfəttişliyinin rəisi, polis polkovniki Vaqif Əsədov məlumat verib.
Əsədov bildirib ki, yol polisi gücləndirilmiş iş rejimində işləyir. Lakin bəzi sürücülərin məsuliyyətsizliyinə görə qəzalar baş verir, tıxaclar yaranır. Sürücülərə paytaxtın mərkəzi ərazilərində şəxsi avtomobillərdən istifadə etməməyi tövsiyə edirik. Bu istiqamətdə ictimai nəqliyyatdan istifadə etməlidirlər. Eyni zamanda, Neftçilər prospektində durma-dayanma qaydalarına riayət etmək lazımdır.
Polis polkovniki əlavə edib ki, polisin fəaliyyətini vətəndaşların, xüsusilə insanların sıx olduğu yerlərdə təhlükəsizliyinin təmin edilməsinə yönəlib. Yol hərəkəti qaydalarını pozan sürücülər qanunvericiliyə uyğun olaraq cərimələnəcəklər.
