Azərbaycan Yerüstü Nəqliyyat Agentliyinə məxsus müasir tipli sərnişin dayanacağında antisanitar vəziyyət müşahidə olunub.
Bakuplus.az xəbər verir ki, bu barədə görüntülər sosial şəbəkədə yayılıb.
Metronun "Azadlıq prospekti" stansiyasının yaxınlığında yerləşən dayanacaqlardan birində bəzi hissələr siqaretlə yandırılıb.
Videogörüntülərdə həmçinin dayanacağın daxili hissəsinin də zibilləndiyi görünür.
Azərbaycan Yerüstü Nəqliyyat Agentlinin mətbuat xidmətinin rəhbəri Tural Orucov saytımıza bildirib ki, paytaxt ərazisindəki bütün dayanacaqlarla bağlı mütəmadi olaraq monitorinqlər aparılır: "Eyni zamanda vətəndaşlardan daxil olan müraciətlər əsasında da yerlərdə pavilyonlara baxış keçirilir. Aşkar edilən nöqsan və çatışmaqzlıqlar aradan qaldırılır. Müxtəlif zamanlarda kənar müdaxilələr nəticəsində pavilyonun konstruksiyaları və elementləri zədələnir və sıradan çıxarılır, bəzi hallarda isə müxtəlif şəxslər tərəfindən məqsədli şəkildə əmlaka ziyan vurulur.
Dövlət əmlakına ziyanın vurulması ilə bağlı hüquq-mühafizə orqanlarına müraciət də olunur".
