Paytaxt ərazisində divarlarda narkotik vasitələri təbliğ edən şüarlar yazan şəxslər saxlanılıblar. Bu haqda bu gün, 17 fevral tarixində Bakuplus.az Daxili İşlər Nazirliyinə (DİN) istinadən xəbər verir.
Polis əməkdaşları tərəfindən keçirilən tədbirlər nəticəsində həmin əməli törədənlərin 25 yaşlı İ.E., 22 yaşlı C.E., 20 yaşlı Ə.Ə. və 21 yaşlı A.H. olduqları məlum olub.
Saxlanılan şəxslər cari ilin yanvar ayından paytaxtın müxtəlif ünvanlarında narkotik satışı aparılan kanalların adlarını yazırdılar. Onlar xaricdən idarə olunan kanalların adlarını divarlara yazıb, əməli lentə alıb sifarişçiyə göndərirdilər. Bunun qarşılığında gənclər pul alırdılar.
Narkoşəbəkə adminləri hər bir çəkilən fotoya görə pulları kriptovalyuta formasında göndəriblər.
"DİN-in müvafiq Baş İdarəsində xaricdən verilən sifarişlərin icrasını təşkil edən şəxslər ətrafında araşdırmalar davam etdirilir. Telegram platformasında həmin informasiya mənbələrinin məhdudlaşdırılması ilə bağlı addımlar atılır", – deyə məlumatda vurğulanıb.
