Bakıda "Dream Fest" həyəcanı: Dünya ulduzları paytaxta gəlir
Bakuplus.az xəbər verir ki, bu həftə Bakı möhtəşəm musiqi bayramına ev sahibliyi edəcək. Yay mövsümünün ən yaddaqalan tədbirlərindən biri hesab olunan "Dream Fest" çərçivəsində dünyanın və Azərbaycanın tanınmış ulduzları paytaxtda bir araya gələcəklər.
İyulun 23-dən 26-dək "Sea Breeze" istirahət mərkəzində keçiriləcək festivalda 50-dən çox məşhur ifaçı səhnəyə çıxacaq. Dörd gün davam edəcək musiqi bayramında sənətçilər illərdir dillər əzbəri olan hit mahnılarını səsləndirərək tamaşaçılara unudulmaz anlar yaşadacaqlar.
Festival proqramında xarici ulduzlarla yanaşı, Azərbaycanın sevilən sənətçiləri də yer alıblar. Xalq artistləri Emin Ağalarov, Aygün Kazımova, Zülfiyyə Xanbabayeva, Faiq Ağayev, Tünzalə Ağayeva, eləcə də müğənnilər Roza Zərgərli, Nigar Camal, Elnur Hüseynov və digər tanınmış ifaçılar möhtəşəm konsert proqramı ilə çıxış edəcəklər.
"Dream Fest"in aparıcılığını isə Xalq artisti Murad Dadaşov və Ukraynanın tanınmış televiziya aparıcısı Regina Todorenko edəcəklər.
Qeyd edək ki, hər il minlərlə musiqisevəri bir araya gətirən "Dream Fest" bu il də zəngin proqramı və ulduz qonaqları ilə yayın ən yaddaqalan musiqi hadisələrindən biri olmağa iddialıdır.
