Ötən günlərdə müvafiq marşrut xətləri üzrə 167 ədəd BYD markalı tam elektrik mühərrikli avtobus xidmətə başlayıb. Bu avtobuslar həm ekoloji baxımdan digər avtobuslarla müqayisədə zərərsizdir, həm də hərəkət zamanı səs çirkliliyinin qarşısını alır.
Ancaq bəzi sərnişinlər iddia edirlər ki, elektrikli avtobusların sürəti sıxılmış qazla işləyən avtobuslara nisbətən daha yavaşdır.
Onlar deyir ki, öncədən 40 dəqiqəyə mənzil başına çatsalar da, hazırda həmin yolu 1 saata başa vururlar.
Maraqlıdır ki, bu, avtobusların texniki fərqindən irəli gələn haldırmı?
Nəqliyyat eksperti Rauf Ağamirzəyev bizim.media-ya açıqlamasında bildirib ki, bu iki avtobus arasında birinin qazla, birinin elektriklə işləməsindən başqa böyük texniki fərq yoxdur.
O vurğulayıb ki, avtobusların yenilənməsi, ödəniş vasitələrinin çeşidliliyi, hətta yeni avtobusların təkcə mərkəzdə yox, həm də şəhərətrafı qəsəbələrdə istifadəyə verilməsi çox müsbət haldır:
"Marşruta buraxılan yeni elektrobusların adaptasiya dövrüdür. Elektrikli avtobusların yeni gətirildiyi ilkin vaxtlarda da buna oxşar gecikmə halları müşahidə olunurdu".
Ekspert vurğulayıb ki, yaxın günlərdə belə hallar öz həllini tapacaq, gecikmələr aradan qalxacaq.
