Azərbaycan Fövqəladə Hallar Nazirliyi (FHN) Yeni il bayramı günlərində yanğın təhlükəsizliyi qaydalarına riayət olunması ilə əlaqədar əhaliyə müraciət edib. Bu haqda bu gün, 8 dekabr tarixində Bakuplus.az məlumat verib.
Müraciətdə qeyd olunduğu kimi, bəzədilmiş küknar ağacı (yolka) ətrafında keçirilən bayram tədbirləri yanğın təhlükəsi yaradır. Bəzən insanların ən elementar təhlükəsizlik qaydalarına məsuliyyətsiz münasibəti bayramın faciəyə çevrilməsinə səbəb olur.
Bununla əlaqədar olaraq, FHN əhaliyə müraciət edərək riayət edilməsi vacib olan aşağıdakı yanğın təhlükəsizliyi qaydalarını xatırladır:
- evlərdə və şənlik məkanlarında bəzədilən küknar ağacı yerə möhkəm bərkidilməli, ağacın budaqları tavana və divarlara toxunmamalı;
- işıqlandırmada saz və standarta uyğun elektrik qurğu və cihazından istifadə edilməli;
- ağac tezalışan oyuncaqla bəzədilməməli;
- qapalı məkanda atəşfəşanlıq edilməməlidir.
