2022-ci il “Formula 1” Azərbaycan Qran Prisinin pərəstişkarları üç gün davam edəcək nüfuzlu tədbir zamanı Bakıdakı yarışı canlı izləməklə yanaşı, Bakı Bulvarında əyləncə proqramlarında iştirak edə biləcəklər. Bu haqda bu gün, 1 iyun tarixində Trend məlumat verib.
Tədbirlər müxtəlif üsullarla və konseptlərdə təqdim olunacaq. Nümayiş olunan stendlərin bəziləri (Zona 2-də yerləşən stendlər) Azərbaycan mədəniyyəti, incəsənəti və tarixini təqdim edir.
Tamaşaçılar Qobustan guşəsində qayaüstü rəsmlər fonunda şəkil çəkdirəcək və qaval sədalarından həzz alacaqlar. Səhnə geyimlərində çıxış edən sənətçilər o dövrlərin rəqslərini, ovçuluq ənənələrini nümayiş etdirəcək, tamaşaçıları ayaqyalın gəzməyə dəvət edəcəklər.
“Azerbaijan Cultural Corner” guşəsində rəngarəng ornamentli xalçalar, milli geyimlər, qədim artefaktlar, mis və keramika nümunələri təqdim olunacaq.
“Nəhəng əllər” guşəsində isə tamaşaçılar Formula 1 dünyasına “toxunmaq” imkanı əldə edəcəklər. Azərbaycan bayrağının rənglərinə boyanmış əzəmətli əllərin “Dünyaya toxunan” instalyasiyası xalqımızın həmrəylik və dostluq ənənələrini tərənnüm edir.
Bulvarda, həmçinin milli ornamentlərlə və Azərbaycan Qran Prisinin Xəzər dənizinə baxan heşteqi ilə bəzədilmiş F1 bolidi nümayiş etdiriləcək.
