Bakı Şəhər Halqasının şöbə müdiri pul mənimsəməkdə ittiham olunur. Bu haqda bu gün, 12 mart tarixində Bakuplus.az Qafqazinfo-ya istinadən xəbər verir.
2015-2020-ci illərdə Bakı Şəhər Halqası Əməliyyat şirkətinin İdman Əməliyyatları şöbəsinin rəisi işləmiş Çingiz Mehdiyev cinayət məsuliyyətinə cəlb edilib. O, külli miqdarda dövlət vəsaitini mənimsəməkdə və həmin pulları qanunsuz leqallaşdırmaqda ittiham edilir.
Ç.Mehdiyev “Formula 1” yarışları ərəfəsində marşallar üçün geyim, ləvazimat, yağçəkən parçalar və digər əşyaları sifariş verərkən malların qiymətini süni şəkildə artırıb. Həmçinin dövlət büdcəsindən ayrılmış pulları öz yaxın adamlarının adına olan şirkətlərə köçürüb.
Həmçinin o, Seyşel adalarında cinayətdən xəbərsiz anasının adına yaratdığı şirkəti “Formula 1” yarışlarının keçirilməsi üçün ixtisaslaşmış təşkilat kimi təqdim edərək müqavilə bağlatdırıb. Təqsirləndirilən şəxsin ümumilikdə 397.852 AZN mənimsədiyi və pulları xarici banklara köçürdüyü bildirilir.
Çingiz Mehdiyevə qarşı 4 maddə üzrə cinayət işi açılıb, onun 1 milyon AZN-ə yaxın dəyəri olan əmlakları müsadirə edilib. 100.000 AZN Ç.Mehdiyev tərəfindən dövlət büdcəsinə geri ödənilib.
