Milli Məclisin eks-deputatı, müxalifətçi Milli Şuranın üzvü Gültəkin Hacıbəyli xaricdən qayıdarkən Bakı hava limanında saxlanılıb. Bu haqda bu gün, 30 noyabr tarixində APA məlumat verib.
İlkin məlumata görə, Gültəkin Hacıbəyliyə qarşı xüsusi ittiham qaydasında ötən ay Nəsimi Rayon Məhkəməsinə şikayət verilib. Onun barəsində Azərbaycan Respublikası Cinayət Məcəlləsinin 147.2-ci (“Şəxsi ağır və ya xüsusilə ağır cinayət törətməkdə ittiham etməklə böhtan atma”) maddəsi ilə cinayət işi başlanıb.
Hacıbəyli hava limanında saxlanılarkən onun axtarışa verildiyi məlum olub.
Eks-deputatı məhkəməyə Nəsimi Rayon Polis İdarəsinin əməkdaşları aparıblar. O, ifadə verdikdən sonra sərbəst buraxılıb.
Gültəkin Hacıbəylinin vəkili Bəhruz Bayramovun sözlərinə görə, müdafiə etdiyi şəxs barəsində həbsli axtarışla bağlı qərar ləğv olunub.
“Ondan xüsusi ittiham qaydasında şikayət edən Leyla Arif adlı şəxsdir. Leyla Arif sosial şəbəkə hesabında Gültəkin Hacıbəylinin ona böhtan atdığını bildirib və barəsində şikayət verib”, - deyə vəkil bildirib.
Gültəkin Hacıbəyli ölkədə olmadığı üçün onun barəsində həbs qətimkan tədbiri seçilib. Hazırda dayandırılmış proses davam etdirilib, hakim Elməddin Hüseynovun sədrliyi ilə işə baxılması dekabrın 8-nə təyin edilib.
