Restoranda vətəndaşı bıçaqlayan Polad Salmanovun apellyasiya şikayətinə baxılıb. Bu haqda bu gün, 9 fevral tarixində Bakuplus.az Pravda.az-a istinadən xəbər verir.
Bakı Apellyasiya Məhkəməsində hakim Elmar Rəhimovun sədrliyi ilə keçirilən prosesdə qərar elan olunub. Apellyasiya şikayəti təmin edilməyib, birinci instansiya məhkəməsinin çıxardığı hökm dəyişdirilmədən saxlanılıb.
Hadisə ötən ilin aprelində Binəqədi rayonunda baş verib. "White Palace" restoranında sərxoş 2006-cı il təvəllüdlü P. Salmanov və 2005-ci il təvəllüdlü Xəyal Hüseynov mübahisə ediblər. Nəticədə ikinci bıçaqlanıb.
Salmanov saxlanılaraq Binəqədi Rayon Polis İdarəsinin 4-cü Polis Şöbəsinə təhvil verilib. Ona qarşı Cinayət Məcəlləsinin 126.2.4-cü (Qəsdən sağlamlığa zərər vurma, ümumi təhlükəli üsulla, xuliqanlıq niyyəti ilə) maddəsi ilə ittiham irəli sürülüb.
Bakı Ağır Cinayətlər Məhkəməsinin hökmü ilə Polad 6 il 6 aylıq həbs olunub. Hökmdən narazı qalan məhkum apellyasiya verib.
