Göygöldə saçlarına vurulan bit əleyhinə dərmandan zəhərlənən 4 uşaq Bakıya gətirilib. Bu haqda BakuPlus.az Qafqazinfo-ya istinadən bu gün, 11 avqust tarixində xəbər verir.
Ötən gün zəhərlənmə şübhəsi ilə Göygöl Rayon Mərkəzi Xəstəxanasına gətirilən uşaqlar reanimasiya şöbəsinə yerləşdiriliblər. Sonradan 12, 11, 10 və 9 yaşlı yeniyetmələr təcili tibbi yardım reanomobili vasitəsilə Bakıya təxliyə ediliblər.
Kliniki Tibbi Mərkəzin Toksikologiya şöbəsinə yerləşdirilən yeniyetmələrin hazırda həyati təhlükələri yoxdur, vəziyyətləri stabildir. Onların həkim nəzarəti altında müalicələri davam edir.
Uşaqlar saçlarında olan biti aradan qaldırmaq məqsədilə mal-qaranı dezinfeksiya etmək üçün istifadə edilən “Niastol” adlı kimyəvi maddəni saçlarına vurublar. Bundan sonra onlar zəhərləniblər.
