Məsələ ilə bağlı Azərbaycan Qida Təhlükəsizliyi Agentliyi (AQTA) sorğumuza cavab verib.
Qurumdan Bakuplus.az-a bildirilib ki, sosial mediada yayılan görüntülər AQTA tərəfindən nəzarətə götürülüb:
"Məsələ tərəfimizdən araşdırılaraq, qanunamüvafiq tədbirlərin görülməsi təmin olunacaq".
***
10:17
"Buzdağı" MMC su istehsalı şirkətinin fəaliyyəti ilə bağlı narazılıq yaranıb.
Bakuplus.az-ın məlumatına görə, şikayətçi vətəndaş bildirir ki, şirkətin su doldurma prosesi zamanı gigiyenik qaydalara riayət olunmur.
Onun sözlərinə əsasən, su plastik şlanq vasitəsilə bidonlara doldurulur, məhsulun hazırlandığı ərazi isə çirkli, antisanitar vəziyyətdədir.
"Bu vəziyyət istehlakçılar üçün ciddi sağlamlıq riski yaradır və qida təhlükəsizliyi standartlarına ziddir. Məsələ ilə bağlı müvafiq qurumların araşdırma aparmasını və qanunvericiliyə uyğun tədbirlər görülməsini istəyirəm", – deyə şikayətçi bildirib.
Məsələ ilə bağlı Azərbaycan Qida Təhlükəsizliyi Agentliyinə sorğu ünvanlanıb.
