Bakının Heydər Əliyev prospekti, Azərbaycan Dövlət Rəssamlıq Akademiyası ilə üzbəüz şəhər istiqamətində güclü tıxac müşahidə olunur. Tıxacın yaranmasına səbəb dörd TIR maşınının sürücülərinin etiraz aksiyası keçirməsi olub. Bu haqda bu gün, 17 fevral tarixində Oxu.az məlumat verir.
Qeyd edilir ki, sürücülər TIR avtomobillərini yolun ortasında saxlayaraq nəqliyyatın hərəkətinə maneə yaradıb. Həmin şəxslər Dövlət Avtomobil Nəqliyyatı Xidmətinin rəisi Anar Rzayevə və şöbə müdiri Malik Əliyevə etirazlarını bildiriblər.
Yük maşınlarının sahibləri dövlət orqanlarından icazə vərəqlərini tələb edirlər. Onlar gətirdikləri malların icazələrin verilməməsi səbəbindən xarab olduğunu bildirirlər.
Hadisə yerinə polis əməkdaşları cəlb olunub. Yolun açılması istiqamətində işlər görülür.
Prospektin ikinci dərəcəli yolunun bir hissəsində hərəkət məhdudlaşdırılıb.
10:57 - Yenilənib
Bakının Heydər Əliyev prospektində nəqliyyatın hərəkəti bərpa edilib.
