Bir neçə gün öncə Mərdəkan qəsəbəsində Xəzər dənizinin nəzarətsiz ərazisində 2 yeniyetmənin batması ilə bağlı təfərrüatlar məlum olub.
Hadisə zamanı dənizdə itkin düşən 17 yaşlı Nurlan İsmayılzadənin babası deyib ki, Nurlan idmana getmək adı ilə evdən çıxıb:
"Nurlan ailənin yeganə oğludur. 149 nömrəli məktəbi bu il bitirmişdi. Universitetin dizaynerlik fakültəsinə qəbul olunmaq istəyirdi. Evdən çıxanda anasına "idmana gedirəm" deyib, çantasına idman ləvazimatlarını yığıb gedib. Bir müddət sonra xəbər gəldi ki, sinif yoldaşı ilə birlikdə dənizdə batıb".
Məlumata görə, Nurlan İsmayılzadə sinif yoldaşı, 17 yaşlı Rahil Ağazadə ilə birlikdə çimərliyə gedib. Dənizdə çətin vəziyyətə düşən Nurlanı xilas etməyə çalışan Rahil də suda batmağa başlayıb.
Rahil Ağazadə Fövqəladə Hallar Nazirliyinin əməkdaşları tərəfindən sudan komatoz vəziyyətdə çıxarılıb.
Hazırda FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri Nurlan İsmayılzadənin tapılması istiqamətində axtarış-xilasetmə əməliyyatlarını davam etdirirlər.
Mənbə: teleqraf.az
